الرئيسية
إذا كنت من مواليد 1980-1989 اقرأ للآخر
1- إذا كنت من الناس اللي حضرو بالمرحلة الابتدائية مسلسل ماوكلي وبرنامج بريد الأطفال اللي كانت تقدمو ماما فاتنة الله يعدمنا ياها و الكابتن ماجد , أما بمرحلة الإعدادي مسلسل الرجل الآلي و أبو الهنا و جميل و هناء .
2- إذا تابعت كل الإعلانات الحلوة اللي كانت تطلع ع قناة البرنامج العام متل دعاية محارم ديمة و علكة منطاد و بطاطا لوكس و شوكولا سوارين الخ .....
3- إذا لحقت الدعايات اللي كانو يطلعو بعد نشرة أخبار الساعة 8.30 اللي بيطلعو بشاشة زرقا و فيا كتابة عم تطلع من تحت لفوق و كانو ع الأغلب يا مشان التطوع بالكلية الحربية يا لترشيد استخدام الكهرباء و الماء يا مشان تنبيه الأخوة المواطنين ع ضرورة التبرع بالدم .
4- إذا لحقت مقدمة الأخبار القديمة , و اللي كان يقدما مهران يوسف و ميساء سلوم و رائدة وقّاف و علاء الدين الأيوبي قبل ما يصير مندوب وزارة العدل للتلفزيون السوري.
5- إذا لحقت ولادة الإذاعة اللي كسرت الدنيا و بعد طول انتظار و اللي صرت تتباها فيا بوصول وطنك للتطور بأن صار عندو مساحة ع موجة الFM وقت طلعت إذاعة صوت الشباب بسنة ال 2000كما أذكر.
6- و ع سيرة سنة ال 2000 لا تقلي أنو ما فكرت (بينك و بين حالك) بالكلام اللي كنت تسمعو كتير عن المشاكل اللي رح تصير الساعة 12.00 بالليل يوم31/12/1999 و أنو أشفي أجهزة كهربائية و الكترونية عليها السلام
7- إذا كنت عاصرت غنية الحب الحقيقي لمحمد فؤاد قبل ما يصير دب قطبي و غنية علمتيني أحب الدنيا لراغب علامة و ما بقاش أنا لأصالة , و بالله يا سايق الهجن أمشي على هونك لشادي جميل و غنية ربا الجمال تبع أسأل روحك اللي كانت تطلع بحفلة ع القناة الأولى و غنية ديانا حداد (ساكن) و عودوني لعمر دياب و مصطفى قمر المعلاق و غنيته الليله دوووب و إذا كنت شهدت ولادة نجم عالمي جديد اسمو علي الحجار و أليوم روح روحي لنجوى كرم و النجاح اللي حققتو من ورا هالأليوم وخاصةً بين أواسط شوفيرية السرافيس و التكاسي و اشتريت كاسيتات عمرو دياب و لبست نفس البلوزة اللي لبسا بفيديو كليب تملي معاك و حطيت 2كغ جيل ع شعرك و سئلتو لورا حتى صار يزحلط ع ئد مو زفر مشان تساوي متلو بكليب عودوني, و أيام ما تسجل على ورقة المنوعات اللي بدك تسجلا ع شريط كاسيت و ترو لعند المحل و تطلب تطبيق هالأغاني ع شريطMacxell حصراً لأنو أداؤه أحسن الشي هيك كنا مفكرين .
8- إذا وقفت العصريات بالصيف ع البلكون بعد ما تكبلك سطلين مي مشان الرطوبة و شعلت شريط كاظم الساهر تبع مدرسة الحب و وقفت بالشيال و بأيدك سلسال عم تلولح فيه و حاطط راست تحت المي و عم بتنفض بشعراتك و أنت عم تنوضر ع بنت الجيران .
9- إذا كنت عم تتابع برنامج ما يطلبه الجمهور و عم تقول لحالك عسى و لعلى يطلعك شي غنية عليها القيمة , بس وقت شفت الشريط اللي بيحطوا فيه الأغاني الموجودة لحلقة اليوم , انصدمت و حشكت و قلبت التلفزيون ع القناة التانية و كان طالع فلم أجنبي لليافعين موضوعه عن الأحصنة و تربيتون , أجباري رح تئبل فيه مو بكيفك .
10- إذا شعرت بقرحة مزمنة الساعة 4 بعد مارجعت من المدرسة و كان دوامك الضهر وخلصوا برامج الأطفال الله يجعلون برامج أطفال و بلشنا ئرح بئاااااااااااا , ع برامج القناة الأولى مع العمال , مع الحرفيين , مع الطلبة , مع المقاتلين , مجلة الأمل , مجلة الأسرة , أبناؤنا بالجولان.....
11- إذا قضيت يوم عيد الأم ربعو مع أم عمار(ماريا ديب وبرنامج ما يطلبه المشاهدون حلقة خاصة) و ربعه مع جهاد سعد (برنامج خبرني يا طير ) و نصه نقل مباشر من عين التينة بالجولان و شلون الاحتلال الغاشم عم يفرق بين الأمهات و الأولاد و شلون عم يقطع أوصار المحبة الأسروية , بس هالشي ما منع الشعب الحي من أنو يروح ع عين التينة و ياخد المكيرفون و يجوجئ من ضفة لضفة مع أنو بحطون برئبتي ما حدا فهمان ع حدا و ماحدا سمعان حدا .
12- إذا كنت من هواة بسكويت السحب اللي كان يربح هدايا حدث و لا حرج , ولا من هواة الستيكرز جمع ألبوات صور كبتن ماجد و كابتن رابح و البوكيمون ووووو الخ، أو من هواة جمع الصحون الطائرة اللي تعدد أشكالها وأنواعها، و مين فينا ما راح صرف خرجيتو و لطش خرجية حدا من أخواتو مشان يشتري علية مسكة كاملة عسى و لعلى بتطلعو بألبا صورة مختومنة , أصلاً ما اغتنت شركة خيري و كلاس إلا من ورا طشمنتنا .
13- إذا شفت التيشرتات اللي كانو يحطوا عليها صور نجوى كرم و نوال الزغبي و جورج وسوف ، ولا الكنزات تبع مونديال 98 اللي صار بفرنسا ... وقتا كنت شجع البرازيل وخسروا ... آآآآآآخ .
14- مين فينا ما طرئو عين لرفيئو بالمدرسة اللي أجا عم يئلو أنو ركبنا دش قطروا 9 متار و بيطالع 80 قناية و أخد عنو فكرة أنو رفيئوا أنو كذاب ، كيف لا خاصة و أنو كان الديش كان يكلف بين ال 60 و ال 100 ألف ليرة.
15- مين فينا ما كان مفكر أنو عندو ثروة ثقافية أو مجموعة بمجرد احتفاظو بشي 20أو 25 لغز من الألغاز تبع هدول المغامرين الخمسة (لوزة , و نوسة , و عاكف و وطوط ما بعرف شو ,,,,,)
16- مين فينا مالعب الميكانو لعبة مهندسي المستقبل ,وحلم يشتري طابة أوفيشال تبعيت مونديال ال 98 الأصلية .
17- مين فينا ما شجع نادي الجيش لما كان يربح كل المباريات .. أنا شخصياً ما بذكر أنو كان في غيرو !!.
18- مين فينا ما كان تيجي الرجفة وئت شي حدا من زملاء الدراسة الذين يمتهنون الكدب يكدب علينا و يئلنا أنو خال أمو عقيد مدري عميد بالمخابرات الجوية و شرطك يكون عم يحكي بصوت واطي .
19- مين فينا كان يحب مسلسل بطوط الضراب السخن (بطوط الشهير)
20- مين فينا ماكان يحلم ببسكليت 24 أبو الغيارات , و يحلم بالواكمان تبع الشريط ؟؟
21- مين فينا أيام ما كان صغير ما خوفوا أهلو من العتمة و من أم رعيدة اللي كانت أشهر من نانسي عجرم هلق .
22- مين فينا ما سمع الديو بين وائل كفوري و نوال الزغبي (مين حبيبي أنا ) و بين راغب علامة و أليسا (بتغيب بتروح).
23- مين فينا ما شاف رأفت الهجان و ما كان يفهم منو شي (بس عبتابعو لأنو أبو و أمو عم يشوفو) بس ساوا حجة مشان يسهر شوي زيادة.
24- مين فينا ما تابع المسلسلات اللي كانت تطلع ع القناة الأولى الساعة 9.30 بعد الأخبار و كان ينحر و يقتل من حرتو وئت يكون في عيد قومي أو وطني بشي دولة موقعين معا معاهدة صداقة فكانو يلغو المسلسل و يطالعو برنامج وثائقي عن هي الدولة .
25- مين فينا أيام الابتدائي ما كان يغلط بشي 500 كلمة و يئولا غلط بالنشيد السوري من أصل 503 كلمات.
26- مين فينا ما كاااااااااااااااان معلائو تئيل و غليظ أيام الاعدادي ., وقت كنا نفكر حالنا صرنا رجاااااااال صوتا تخين و خطوا شواربنا و خود ع بياخة ...
27- مين فينا ما كانو رفئاتو يصرخولو بكنيتو و هو يصرخ لرفئاتو كمان بالكنية أيام الاعدادي , وخصوصاً وقت كنا نلعب طابة .
28- مين فينا ما راح ع هاد اليوم العسكري اللي كان يصير يوم الجمعة الساعة 9 الصبح هلق أنا ساويت مناحة بالبيت لحتى رجت .. و ياريتني ما رحت .
29- مين فينا أيام الأعدادي ما كان يشيل الكتافيات و يقلب كمام البدلة بعدما يطلع من المدرسة , هاد إذا ماكان شاري نضارات شمس أم ال 25 و حطون هيك شغل ضوج .
30- مين فينا ما اتئلع و اتسكر الخط بوشو مليون مرة وئت كان يتصل برفيئو مشان يسألو من وين لوين داخل معنا بالمذاكرة و هو بيعرف شو داخل بس اتصل أصادن مشان يضيع وئت و يستعمل التليفون الجديد اللي ما عم يرن يا حسرتي.
31- مين فينا ماكان يموت من الرعبة ئبل ما يدخل ع البيت الساعة 9 المسا لأنو أبو و أموه بدون يشبحو ع القمر لأنو اتأخر ع البيت و موصينو أنو بعد الساعة 7 مافي دخلة ع البيت بس الله يلعن رفاق السوء .
32- مين فينا كان يحب المسلسلات المصرية اللي كانت تطلع ع التلفزيون الساعة 11.30 و اللي كانو المصاروة هنن ذاتون كابين هالمسلسلات الصعيدية اللي ضعيفة ع كل المستويات (لا قصة متل الخلق لا سيناريو لا حوار لا إخراج لا تمثيل لا حبكة لا تصوير لا إضاءة , لا تأثيرات ) و لك يا جماعة حتى وش حلو يوحد ربو ما كان فيه.
33- مين فينا ما تابع كسندرا و حب راندو من تحت لتحت شنو كانت المسلسلات المكسيكية متحررة كتير حسب فكرنا بهداك الوقت ، ومين ما اتأثر بالحب الكبيراللي كان يربطون و مين فينا صدق أنو معئول تكون المكسيك كل هاد صغيرة لحتى طلع راندو آخر الشي أخوا لكسندار و دورنديا أما برضاعة و الجد الكبير طلع اخوا , المهم أنو كان هالمسلسل كان فيو صدف فعلاً شي ........ غير شكل .
34- مين فينا ما تابع مسلسل عيلة 5 نجوم , 6 نجوم , 7 نجوم , و ما بعرف إذا كان فيه 8 نجوم تبع أبوك يالدسك و الواوية و الدست , و أبو كيروز ,,, يلعن أخت هالألفاظ شلون حفظناها , ليش كان فيه مسلسل لأندريه سكاف و حسام عيد و نحن بزمناتو كتير كنا نضحك عليه مع أنو كان سخيف جداً , و لسه عائلتي و أنا و المحكوم اللي مثل فيه جمال سليمان , و مسلسل الأخوة (زهير عبد الكريم و سلوم حداد و بسام كوسا و أمون منى واصف) , مسلسل يوميات مدير عام غني عن التعريف أكتر الشي بتذكر أنو ضحكت ع شخصية نبيه الحدق اللي لعبا أيمن زيدان ,
35- مين فينا كان بيعرف شو هي حصة الطلائع اللي كانو يحطولنا ياه يوم الثلاثاء سادس حصة ؟؟ و كانت الآنسة تطالع لبرة تحكي مع الآنسات و نحن عم نعفرت جوا , أنا لهلق ما عرفت شو معناتا هالحصة و ليش كانو حاطينا .
36- مين منا ما جمع صور مطربين و رياضين و مشاهير و لزقا هون وهون .
37- مين فينا ما كان يجعر و يبكي ما بدو ياخد دوا السعلة لأنو مر , بس كانت أمو أول الشي يالله حبيبي يا الله هاد دوا ما بيصير لازم تاخدو مشان تطيب و تضل عم تجي معنا بالأسلوب اللين و نحن نتمنع بعدين انما للصبر حدود ,,,,,, فتاح تمك ولاااك , و هون أنت متل الحباب رح تفتح تمك و تشربو فيا العافية .
38- مين فينا بيئدر ينسا اليجامات النفخ اللي كانوا يلبسوا الأكبر مننا هدول اللي أيدهون و أجريهون بيكونوا زم و ألوانون ياسلااااااااام , شي تريكواز شي زهري مأنشح شي أصفر مخنق .
39- مين فينا ما بيذكر بطاطا زقزوق و ميلان و طبوش .... الخ
40 قبل الأخيراً - طيب كازوز جلول و سينالكو و خزنة ؟؟؟
41 وأخيراً - مين فينا مابيحب هالشغلات الحلوة كلا فعلاً ,أنت محظوظ فعلاً لأنو حضرت هالئصص مين بيقدر ينكر أنو ماكان مبسوط وقت كان صغير , مو متل جيل هالأيام كلو عايش عالياي ..بس ما بعرف إذا قدرت ضحكك أو ذكرك بشي حلو كنت نسيانو .
