مذكرات حمصي

عن جد حلو ذكرني بكثييير أشياء
> > >
> > >
> > >
> > > مذكرات حمصي صفنان
> > >
> > > اجيت على حومص بعد تلات سنين...وبألبي كالعادي شي بيتسمى شوء وحنين
> > >
> > > كنت بالأول اجي يومين تلاتي.....ارجع الخميس وكون بالكتير جاي التلاتي
> > >
> > > بس هالمرة ضليت أكتر....... ما مشان شي..... بس لأنو موعد فيزتي اتأخر
> > >
> > > اول يوم شي ستي الصوبح…………..
> > >
> > > حسيت بريحة.... عم تضرب مونخاري
> > >
> > > ما عرفتها ريحة شي بطن......ماعرفتها شي حفرة مجاري
> > >
> > > ضلت هالريحة ساعتين........وبعدها.... نسيتها لحالي
> > >
> > > فائوا الناس بلا طول سيرة........ وما حدا دريان شو صار.... بهديك الليلة
> > >
> > > عرفت بعدها انو الحماصنة.... عم يناموا ليلهم............والروايح عم تهديلهم
> > >
> > > ومتل ما تعودوا على طأ حنك عالناس...... تعودوا على روايح الحمض والأساس
> > >
> > > تاني يوم نزلت اتمشى بالسيارة ...
> > >
> > > لا تستغربوا.... لأنو المشي على الرجلين.... ما عادت من معالم الحضارة
> > >
> > > عدد السيارات كترت... ومشان هيك البلد.... اتألبت واتحفرت
> > >
> > > صار شارع الغوطة أصغر...... وذكرياتنا على حرافو.. أخدوها على أبعد مكسر
> > >
> > > سألت.... ليش شالوا الأكاسيا والشجر...؟ وحطوا بدالهم كومات الحجر؟
> > >
> > > آلولي في ناس أفهم منك.... بتعرف مصلحتك.... وبتأدر همك
> > >
> > > و آلولي الشجر صايرعم يئزينا..... بدنا نلحئوا بكل حومص... لنشيلوا بالماكينا
> > >
> > > ومشيت بشارع تاني.... ذكرياتوا أقل.... بس حجاروا ابدا ما بتنساني
> > >
> > > هادا الشارع اسمو العراب...... محل ماكانت تعلأ الكعاب
> > >
> > > آلولي انهم ظبطوه .....صار متل الشانزلزيه.....عرضوه و نوروه
> > >
> > > التلهم والله حيرتوني....... وبهالتصميم صطلتوني
> > >
> > > انتو بدكم شوارع عريضة........ ولا ألع الشجر بحومص صاير فريضة
> > >
> > > حموصة صارت مجنوني وبالهوايش.... مفتوني
> > >
> > > حملت حالي ونزلت عالدبلان
> > >
> > > يمكن مافي شي اتغير....... ويمكن انا نسيان
> > >
> > > بس المهم ادريت.... انو الأسعار... ما بالحسبان
> > >
> > > وأصحاب المحلات .... فلان وابن فلان وابو فلان
> > >
> > > التلهم ياناس فهموني..... واذا حكيت طنشوني
> > >
> > > كيف اجرة محل مية الف.......... والناس عم تضرب كف على كف
> > >
> > > هلأ التجار عم يشتغلوابالتياب...؟ ولا انا ماني عم اخود بلأسباب
> > >
> > > آلولي البلد اتغيرت..... ومن احسن لأحسن اتطورت
> > >
> > > وآلولي كمان............ انو لازم كون... حربوء وفهمان
> > >
> > > الت بألبي بعين الله..... ويمكن انا لسا... ما اولت بسم الله
> > >
> > > مشينا هيك على شارع الملعب...... محل ما كنا نروح ونجي.. بدون ما نتعب
> > >
> > > الشارع يا اخوان صاير شي جنان
> > >
> > > أهوة جنب أهوة جنب أهوة.... وبتسأل لمين بيؤولولك.....
> > >
> > > ل فلان وابو فلان وابن فلان
> > >
> > > بلا طول سيرة وفزلكة
> > >
> > > هالشارع صار معجوء........وبالصبايا والشباب.. مفتوء
> > >
> > > أعدت باول وحدة... وبلا ذكر اسامي
> > >
> > > وكانت هاي الأعدة.. بأول ايامي
> > >
> > > للحأ الأعدة ظريفة... والطاولات حلوة ونضيفة
> > >
> > > بس مع انوفاتورة شخصين طلعت خمسمية
> > >
> > > طعمة المشروب كانت آتولية
> > >
> > > قلت يمكن انا غلطان ولازم ماكون نئز أو أرفان
> > >
> > > رحنا على أهوي تاني .. آلولي هاي ملياني... واسمهامابعرف... فرنسي على طلياني
> > >
> > > وبعد ما طلبنا وحضر المشروب
> > >
> > > جابلونا شي غير المكتوب
> > >
> > > كمان الت بالبي... ياولد انتي الغلطان... ويمكن مانك فهمان
> > >
> > > روح جرب الجهة التاني... هادا صاحبو... غير فلان وابو فلان وابن فلان
> > >
> > > وفتنا على هالمكان.......
> > >
> > > حسيت حالي بمكان غير المكان...... وزمان غير الزمان
> > >
> > > كأني ابن السبعين وجاي....... على محلات ولاد العشرين
> > >
> > > مالح احكي شي.... بس طلعت منو صفنان.... وبحالة حومص مدهوش كمان
> > >
> > > وأفت براس الشارع من بعيد..... وحاطط راسي بهالأيد
> > >
> > > وعم اؤول بألبي
> > >
> > > كيف هالجامع يلي عم يأدن هالأدان... عم يطلع منوهيك ناس.. بدون حس او وجدان
> > >
> > > يا ابي رباني غلط.... أو انا صايبني اللغط
> > >
> > > وتذكرت ايام زمان
> > >
> > > لا كنا نروح على جامع.... ولا نحضر دروس فلان وفلانة.... ولاعلان ولاعلانة
> > >
> > > كنا نطلع من المدرسة.... ونركض على شارع الغوطة.... ندعوس على طرابو دعوسة
> > >
> > > نستنى البنات ليطلعوا من غرناطة...... وكل واحد فينا..... عم يمشط شعروا بالمشاطة
> > >
> > > نتفرج عليهم وهني ماشين....... وبألبنا عم نقول........ يا ليل يا عين
> > >
> > > يطلعوا البنات مشنكلين..... وبمشيتهم متفشكلين
> > >
> > > ماكنا نشوف بنت بحجاب..... بس كانوا بأخلائهم...... ينكتب كتاب
> > >
> > > وكنا نتابعهم بعيوننا المتحسسة.... بدون وقاحة او فسفسة
> > >
> > > بس هلأ صارغير..... والحجاب صار شي خطير
> > >
> > > والشباب اتجعلكت.... وبالبنات اتشبهت
> > >
> > > وصرت تشوف بنفس المكان...... الشيوخ مع الزعران
> > >
> > > البنت بتشوفها مصروعة.... بشارع الملعب مزروعة
> > >
> > > عم تتفتل يمين وشمال...... وحالها مو هاد الحال
> > >
> > > من عمرها طنعش بتتغندر.. جنز وبودي.. وبالحجاب بتتستر
> > >
> > > والشب بيلحأها كمان... وبيسمعها كلام.... والله ما بيحملو انسان
> > >
> > > حموصة صارت مألوبي وعلى شيكاغو..... محسوبي
> > >
> > > لح غير حديثي هلأ... مشان ما تؤولوا بالغيبة والنميمة متعلأ
> > >
> > > من تسع سنين طورونا...... وشركتين خليوي حطولنا
> > >
> > > الظاهر ضربتنا عين
> > >
> > > رحتلكم وبلا ذكر اسامي على الشركة الصفرة.... شي مرتب... من جوا لبرة
> > >
> > > والله استأبلونا بالترحاب من أول ما دخلنا الباب
> > >
> > > أطعنا الكرت وأعدنا..... وعن الشريحة استفسرنا
> > >
> > > ألولي خطك وحدات.... وبأيام مأيدات.... وعدولي احلى ميزات
> > >
> > > آلولي في ميزة كلمني... وحول وحدات واشحنني
> > >
> > > الت بألبي يا ويلاااااه ويا ويلااااااه ويا ويلاااااااه
> > >
> > > سحبنا الرقم واخترناه..... وعلى العقد وثقناه
> > >
> > > وبالأخر فتحولي سطامبة.... وآلولي اصباعك لنحطا
> > >
> > > حطيت الباهم وبصمت..... وضبيت لساني وسكتت
> > >
> > > ألتلهم يا اصحاب الخبرة..... بالشركة الحمرة.... بصموني المرة الماضي..و بالعشرة
> > >
> > > والت لحالي ليه وليه... ما جبت معي الدي ان ايه
> > >
> > > نسيت الكم يا اخوان... انو الرومينغ بالمجان.... وفي ميزة حلوة كمان
> > >
> > > لو امك سوتلك مس كول..... وحداتك بتروح على طول
> > >
> > > ألتلهم الله اكبر.....على هالنعمة مالح اتجبر
> > >
> > > وألتلهم شوفي كمان..... خبروني والله انا انسان
> > >
> > > ألولي خطك شغال.... وانشالله بيعجبك الحال
> > >
> > > وحداتي طارت على طول.... بنفس اليوم مو معؤول
> > >
> > > والنهفة انو الكستمر كير....بخمس وحدات.... ومو كتيير
> > >
> > > والت بنفسي........
> > >
> > > جربت الأحمر والأصفر
> > >
> > > الظاهر انو شي مرتب ومدبر
> > >
> > > لح ارجع على النميمة.... واغتاب اصحاب الأيمة
> > >
> > > رحت مرة على السفير.... خمس نجوم... مو كتيير
> > >
> > > طلبنا بوظة وكابوتشينو واركيلة
> > >
> > > وهالأوتيل الخمس نجوم.... جبلنا طلبنا بنفس اليوم
> > >
> > > جاب البوظة بزبدية...... طرافها والله مهرية
> > >
> > > بس والله للأمانة.... طرافها بالبوظة الدايبة.... غرأنة
> > >
> > > ألتلهم بالله منديل......... وامسحوا الطاولة على الأليل
> > >
> > > آلولي تكرم عينك....... منيح على السفير مفوتينك
> > >
> > > مشينا والله وماشي الحال........ كأننا عال العال
> > >
> > > ومرأنا من السبورت كافيه...... وعيوني طايرة عليه
> > >
> > > فاضي عم يبوبي........... والناس فوئوا...عم تفصفص لوبي
> > >
> > > اتذكرت يوم كان بالدور
> > >
> > > كانوا الشباب جوا...... والبنات... على البلور
> > >
> > > النهفة انو هالعادة موجودة ......بأهاوي الملعب معهودي
> > >
> > > بتدخل من تم الباب بيسألوك... شباب ولا بنااااات
> > >
> > > اذا شباب الطاولات بتصير محجوزة...... واذا بنات بتصير فاضي ومعزوزي
> > >
> > > والله العظيم ما عم اتفزلك.......... بس شي بيخلي المصارين تتلبك
> > >
> > > لح وأف مرة تاني عن النميمة.... واحكي عن شغلة بتهم هالأمة العظيمة
> > >
> > > انا مابفهم بالطابة... ولا بالدوري ولا بالكاس
> > >
> > > بس والله شي ما بيدخل بالراس
> > >
> > > كيف نادي بيستثمرهالأهاوي المطشوشي...... جيبتو فاضي ومبخوشي
> > >
> > > سؤال برسم الأجابة لأصحاب الخبرة والانابة
> > >
> > > بدي اسأل المسؤولين..... والتجار المعروفين
> > >
> > > كيف بلدنا لح تتطور...... اذا شبابها عم يترحل
> > >
> > > ليش الشب ما عم يرجع....... مع انو برا موجع
> > >
> > > ماعم الكم ما تبيعوا بضاعة......... أو ما تفتحوا أهوة... جماعة
> > >
> > > بس حاجتكم مؤامرات........ وحاجي دوائر وأبراج...... بالعشرات
> > >
> > > و لازم فهمكم منيح..... وضع هالشب الجريح
> > >
> > > الواحد فيهم عيونوا لبرا....... يدور فيزا سعودية
> > >
> > > بيدفع دم ألبو لكفيلو............. ليعيش حياة عبودية
> > >
> > > وبيكون ببلدوعامل انجاز.......... وشغال بشركة دولية
> > >
> > > ويا عيني بيئضي سنتين...... عم يوفي بهالدين
> > >
> > > وبعدها كمان بسنتين..... بيلم بدلو..... ويخزي العين
> > >
> > > وبيطلع ياحبة ألبي.... زميط....... وبعيون الحماصنة.... طيط
> > >
> > > مرتو بيتعقد ليجيبا.......... وبيفرشلا البيت.... من أريبا
> > >
> > > أخرتها متغرب تعبان............. ومرتو ماعاجبها كمان
> > >
> > > حموصة صارت عجيبة ومن بنغلادش...... أريبة
> > >
> > > آلولي لازم تشتري بيت... مشان تخطب حمصية.... اذا حبيت
> > >
> > > التلهم ليش لأ... ما بدي اطمع كتير.... جنب أهلي.... لا كبير ولا صغير
> > >
> > > آلولي ظبط عشرة مليون..... وأحلى بيت بيجهزلك.... كرمال هالعيون
> > >
> > > انحولت عيوني بالطول وادنيي طنو طن
> > >
> > > ألتلهم أهلي بالغوطة..... والغوطة مانها بواشنطن
> > >
> > > آلولي هاي حمص يا حباب..... بلد الحمص والكباب
> > >
> > > التلهم هالمبلغ كبير..... ولازملوا تفكير وتدبير
> > >
> > > ضربت أخماس بأسداس.... والت بلمهم متل الناس
> > >
> > > وبحسبة صغيرة بسيطة كتير...... عرفت الحل..... وشكرت ربي كتير
> > >
> > > والت لحالي هادا الحل هوي الأنسب...... وأبدا ما لح اتغلب
> > >
> > > واذا عجبكم يا أخوان..... بهديكم اياه بالمجان
> > >
> > > لح روح لعندابوالأحلام.... واقترح عليه منام
> > >
> > > يهدوا حمص بيت بيت
> > >
> > > ويشيلوا الناس بكميون
> > >
> > > ويعوضوهم عن كل بيت
> > >
> > > بمبلغ حوالي المليون
> > >
> > > ويزتوهم بشي أرض....... ويؤولولهم عيشوا هنيك
> > >
> > > ساعتها بتلائي علية..... وبتخطب احلى حمصية
> > >
> > > حموصة صارت منحوسي وبالصرامي...... مدعوسي
> > >
> > > وهلأ اتذكرتلكم شغلة....
> > >
> > > بيوم من ذات الأيام..... افتتحوا أهوة.... اسمها فرنسي
> > >
> > > من جوا مقاعد......... ومن برا..... شي كام كرسي
> > >
> > > ومن غير ذكر أسماء.....
> > >
> > > سألنا لمين المكان؟
> > >
> > > الولنا..... لأبن فلان وفلان
> > >
> > > وسألت عن اسمها..... كيف بنئرا؟
> > >
> > > وحاولت حروفوا.... فسرا !
> > >
> > > وتمينا أكتر من ساعتين.........عم نحاول نفهم هالكلمتين
> > >
> > > والشي المضحك المبكي.......... انو مافي حمصي..... بيعرف فرنسي
> > >
> > > رجعت عالبيت لأسأل الوالد.......... وباسم الأهوة.... متاخد
> > >
> > > والصدمة كانت ما على أدي..... لما عرفت انو معنى الاسم ببساطة....(عندي)
> > >
> > > وعلى فكرة.... ويا بلحئ يا ما بلحئ
> > >
> > > في أهوة لح يفتحوها كمان..... وبرعاية محافظنا الفهمان
> > >
> > > لح ارجعلكم عالتفاهة... مشان ما تملوا... وتفكروني اخد الشغلة وجاهة
> > >
> > > آلولي اصص جديدة......... عن الحب والغرام
> > >
> > > وحكولي انو حمص........ صارت أفظع من الشام
> > >
> > > حكولي عن فالنتينو.......... الكل البنات حابينو
> > >
> > > الحلوة انو منطوط............ وعالبنات بيتحطط
> > >
> > > وحكولي عن شب تاني...... وعن صاحبو ابن فلاني
> > >
> > > ولما بسأل منو هاد؟؟؟؟؟
> > >
> > > بيئولولي صاحب فلانة....وأبلها كان مع علانة
> > >
> > > والمصيبة انو فلانة........ هي صاحبتها لعلانة
> > >
> > > الله يرحم حب زمان
> > >
> > > شب يؤول للبنت بحبك... تضل بألبو عشر سنين
> > >
> > > شب يؤول للبنت بشوفك... ينطرها شي تلات سنين
> > >
> > > هيي تؤولوا تعا اتأدم...... وهوي خيفان من الجيش
> > >
> > > هيي تؤولوا روح اتعلم..... يروح يركض متل كديش
> > >
> > > وبالأخر هيي تتجوز....... وهوي يهاجر حتي يعيش
> > >
> > > حموصة صارت خربانة ومتل انطالية.... فلتانة
> > >
> > > الظاهر طولت كتير....... بالصفن والتفكير
> > >
> > > بس حبيت اوصف حال..... غريب وما كان عالبال
> > >
> > > يمكن كنت مفكر ابئى أكتر...... بس الظاهر المكتوب.... مأدر
> > >
> > > طلعت الفيزة بدون تأخير...... والطيارة لح بتطير
> > >
> > > والأغراض عم تتحضر...... والشناتي عم تتسكر
> > >
> > > وببالي سؤال كبير..... عن الجية التاني..... اذا حتصير
> > >
> > > هل لح ضل وأت كبير...؟ أو برجع الخميس.. بعد ماكون جاي التلاتي بالكتيير
> > >
> > >
> > >

هههههههههههههههههههههههههههه
حلوين