الرئيسية
ولوه.. شو في فرق بينكن وبين الجبل.. ولوه.. وينكن وين الجبل، أنتو وين وهوي وين.. اخ.. شو في مسافة بينكن وبين الجبل.. أخ.. أخ.. الجبل بعيد.. بعيد عنكن كتير.. مسافة مية سنة.. مية قائد.. مية مؤامرة.. مية اجتماع.. بعيد عنكن مسافة مية جبل ووردة حمرا بتيبس وبترجع تطلع بالجبل.. وينكن وين يا ملوك العرب.. ويا ولاد ملوك العرب.. ويا ولاد ولاد ملوك العرب.. ويا جيران ولاد ملوك العرب.. ويا خوال وعمومة ولاد ملوك العرب.. ويا سليلة بني جيران خوال وعمومة ولاد ملوك العرب.. وينكن ووين الجبل.. الجبل طلع.. طلع منكن.. طلع من بيناتكن.. طلع وحدو الجبل.. بقي وحدو عم يقاتل عنكن وبلاكن.. عن مية صحرا ومية جبل.. عم تتفجر صدور الابطال.. والقضية قضية أمتكم ملغمة كل الأرض حواليها.. وصارت محشورة وحدها ورا صخرة بالجبل.. يا أمة العرب يا صحرا فاضية.. لأيمتى بدك تضل حاكمتك الغبرة.. يا ملوك العرب يا براميل الدول الكبيرة.. يا قساطل ومجارير ممدودة على خزانات الأمم.. صباط بعدو بالجبل بيسوا كل التقل المعفن والهيبة المعششة بحواجبكن العريضة.. صباط بعدو بالجبل بيسوا كل اجتماعات جامعاتكن.. واجتماعات أممكن المؤجلة.. يا انتو اللي مأجلين من البشرية.. يا مصبرين وقاعدين بالتاريخ لا بتضهروا ولا بتخلوا حدا يفوت.. يا ورقة مجعلكة ومعلوكي ومزتوتي حد التاريخ.. يا تايهين بالربع الخالي.. الخالي من كل شي.. الجبل ما عاد الو علاقة فيكن.. طالع وحدو.. عم ينزف وحدو.. عم يستشهد وحدو.. يا أمرا العرب.. يا كل الخطابات المسفلسة يللي عديتو ماضي وحاضر ومستقبل شعوبكن.. مطرح ما كنتو تصيفوا.. وتتعاملوا بالدنانير.. ما بقا فيكن تصيفوا.. وعملتكن ما بقى تنصرف.. مصيفكن القديم صار اليوم يتعامل بالدم.. وانتو ما فيكن دم.. يا مشحرين بالزفت.. ومشطفين بالكاز.. وما كنتوا تحترقوا.. الجبل عم يحترق.. يا تماسيح الرمل الأصفر اللي عم تشتروا اوتيلات بلندن.. يا تماسيح الرمل الاصفر والنخيل.. كل اللي حواليكن عم يضحكوا عليكن.. والمصاري اللي بتدفعوها ما بتشتري الناس.. بتشتري سكوتهن عن هبلكن يا بغال.. انتو اللي بتعمروا قصور فوق خيم.. تتناموا بالخيم وتتغطوا بالقصور.. انتو الواحد منكن بيستف ببيتو مية مرا.. وبيشقعهن فوق بعضهن متل المخدات الطراريح وبينستف بيناتهن.. يا طراريح محشية فلوس نجدوكن الاجانب وتليتونا غبرة.. يللي بعدكن بتعلموا ولادكن بكتاب عنتر والزير.. وبدكن سبعة عشر مهندس ليدورلكن "الايركوندشن".. قضيتكن قضية أمتكن ملغمة كل الارض حواليها وصارت محشورة وحدها ورا صخرة بالجبل.. يا أمرا وملوك العرب.. يا لحى السمنة والرز.. يا سيبة شحمة ودهن.. يا كياس مدكوكة تمر وعباطة.. وقصايد وسمن حموي.. يا بطون بالعة بطون.. عم بيحاربولكن بالجبل ليقررولكن مصيركن.. بس انتو ما عندكن مصير.. انتو عندكن بطون بتنبطحوا عليها.. انتو اللي ماشيين بلا كلسات وبلا كرامة.. يا انتو اللي ما بيتداكش عليكن الا بالدولار.. يا انتو اللي مصرياتكن مألعطة المصارف والاوطان والشعوب.. يا انتو العقيدتكن الذل والوطاوي والعبودية.. يا أمة متخصصة بالذل.. بتوصي عالذل توصاية لشعوبها.. يا انتو الموظفين بالهزيمة.. وعم تقبضوا معاشات.. قضيتكن قضية أمتكن ملغمة كل الارض حواليها وصارت محشورة وحدها ورا صخرة بالجبل.. صباط بعدو بالجبل بيسوى كل ساعاتكن الذهبية.. وصوركن اللي مطبوعة فيها.. والخنازير اللي لبسوا الساعات اللي صوركن مطبوعة فيها.. يا انتو اللي سياراتكن الكبيرة الها حردبات بتجتر.. يا نملية الخطابات المسوسة والمحمضة.. يا طبل مفخوت وبعدو عم يزعوط.. يا سحبة حكي وتفشيط مزركشة مكشكشة مزوزءة صرلا مية سنة بتلت وبتعل.. يا صدر قطر ووحل.. يا صينية قشطة بوحل.. عم تدبق شهامة وشيم.. يا مؤتمرات الدجل يا ضحكة رطل كلو خبث وعمالة.. يا عبايات عابطة بعضها قدام الصور وعابئة منها ريحة المؤامرة.. ريحة فحل معزة متأمر على شعوب العرب.. يا أغبى عملا الارض.. يا زعما العرب.. يا دود الخل اللي منو وفي.. يا خرج معبى عقارب.. يا جلال معبى شعارات عا ضهر كديش تايه بالصحاري.. يا ملوك العرب.. يا تيوس مدهوني بعطر.. يا بعير بيشرشر ذكى.. قضيتكن قضية أمتكن ملغمة كل الارض حواليها وصارت محشورة وحدها ورا صخرة بالجبل.. يا انتو اللي ضاربين طنابكن تحت دراج البيت الأبيض.. يا ملوك العرب.. يا عدوى الكلب.. يا كعب الدنب.. يا كلاب.. وحدو الجبل جبل عم يقاتل عنكن وبلاكن.. عن مية صحرا ومية جبل.. والوردة الحمرا بتيبس وبترجع تطلع بالجبل.. وحدو الجبل جبل.
زياد الرحباني
زياد الرحباني
