طرطوس أعطيها لقب المدينة النائمة .. (الجزء 2)

المدينة التي تمثل مركز المحافظة والمفترض أن تعج بالحركة والعمل في كامل أوقات اليوم بدءاً من الصباح الباكر وحتى ساعات الليل الأخيرة ,ولكن كم نأسف حين نرى "طرطوس" المحافظة السياحية الواعدة شوارع شبه خالية من المارة في أوقات ما بعد الظهر والمساء.
ففي الثامنة مساء تقفل المحلات وتخلو الشوارع من المارة ولانجد سوا عمال النظافة (الله يعطيون العافية) ..

السؤال :
لو جاء إليك محافظ طرطوس وقال لك ماذا لديك من أفكار ومشاريع وطروحات لتجعل هذه المحافظة مفعمة بالحيوية والنشاط ليلا مساء ؟؟
(طبعا صعب شوي يصير هالموضوع ولكنه فرض)

مثال على جواب هذا السؤال هو جواب alishoo عندما قال بإقامة شبكات wireless على الكورنيش البحري (فكرة حلوة) ..

"" نحتاج لإبداعاتكم ""

حلوين ها الطروح بس أهم شي يكون في ناس حابة تسهر برا مو بس ع النت

ياي انا شو عندي اقتراحات انا بقترح
انو ينحط على طول الشط كراسي و طاولات و العالم تنزل تقعد تسبح طبعا و شماسي بكل بساطة لانو نتحنا بيوتنا عالبحر و منروح لاخر الدني حتى نسبح
فكرة الزوارق كتير حلوة
ينزلو اسعارون المقاهي شوي لانو طرطوس الى مدينة بالاراكيل و القهوة و العصير مع انو المحلات اقل من عادية
ينعمل كل فترة حفلة صغيرة فرق تعزف او يجي ساحر او مهرج
يعني هيك شغلات بتعمل تجمعات و ما بتكلف كتير
يمنعو منعا باتا قعدة الشباب عالرصيف و شرب المتة و الاراكيل
انا بستغرب بهدول لبيديرو ضهرون للبحر و بيقعدو بالشارع
تاجير مسكليتات
عربات احصنة
القطار موجود حاليا
يعني في كتير افكار

أهم شي تكتر المطاعم مو بس علكورنيش بلعكس لازم تنتشر بكل طرطوس
لأنو مو معقولة المطاعم بس عالبحر في كم مطعم مو عالبحر بس مو بهديك الجودة

هي أول مساهمة لإلي بهلمنتدى الحلو

بس يا دودي نحنا مو مشكلتنا بالمطاعم المطاعم عنا معباية بس فاضية
و الغريب انا متمركزة باماكن محددة
ممكن لازم تتوزع المطاعم بكل المدينة و تتنوع خدماتا

ليش المحافظ شغلتو يجبر العالم تطلع من بيتا
و يجبرا تنزل تكذدر عالكورنيش لو تتعشى بمطعم ثقافة الناس بطرطوس بشكل عام
متشابهة و محدودة ببساطة ما عندون ثقافة اهل المدن
يعني بيفضلو يقضو ايام العطل بالريف على انو يطلعو يتغدو بمطعم او ينزلو عالبحر
هيدا شي الو علاقة بطبيعة الناس و نمط تفكيرا اهل طرطوس ما اخدو طابه اهل المدينة لمتعودة عالسائح و عالغريب
و لا متعودين عنشاطات غير معتادة تقليديين و محدودين لابعد الحدود
يعني في كتير ناس هون بتنظر للجاي من برا طرطوس حتى لو كان سوري على انو غريب و لازم يتطفش

مشكورين جميعا على المرور والاقتراحات الجميلة .. .,....

أنا برأي أن هناك أمور ثقافية وأمور ترفيهية يجب أن تنفذ :
الامور الثقافية مثل:
الندوات والمحاضرات والمسرحيات التعليمية والفنية والترفيهية .. (يعني ممكن يعملو مسرح بالكورنيش البحري ومن خلاله تقدم عروض مسرحية مختلفة .. )

والامور الترفيهية مثل:
- إقامة سيرك وحفلات ومهرجانات التسوق وتقديم عروض أسعار تنافسية .
- إقامة سباقات للسفن الشراعية (فكرة كتير حلوة ومانا صعبة أبدا حتى تتطبق) .

بس بعتقد المشكلة ياشباب وصبايا تتمحور عند عدة أمور مثل :
- أن راتب الموظف لا يتحمل تكبد مصاريف إضافية هو بغنى عنها .
- أغلبية الناس بطرطوس تفضل السهر في الضيع (هكذا جرت العادة) .
- قلة النشاط والخمول عند بعض الشباب والصبايا .
ومن الملاحظ أن طرطوس تشهد في الفترة الأخيرة إقبال كثيف من الناس من المحافظات الأخرى ..