الرئيسية
حوار بدون مقدمات ....
الصيدلي : اهلييين خالة أم راتب ...
أم راتب : آهلين فيك يا ابني ...ماشالله عليك لسه متذكرني ...
الصيدلي : بعد زماااان....وين كل هالغيبة ؟ أدي صار لي ما شفتك ...اكتر من عشرين سنه يمكن ...
أم راتب : إي من يوم ما انتقلنا من هالحارة وقت الله انعم على أبو راتب و انتقلنا لبيت بمنطقة راقية و تحسنت أمورنا كتير و صرنا من العائلات الغنية ...
الصيدلي : إي و شلونوا عمي أبو راتب و شو رجعك لهالحارة الشعبية الفقيرة ...
أم راتب : أبو راتب عطاك عمره من أربع سنين ، أما شو رجعني فهي قصة طويلة ...
الصيدلي : تفضلي ارتاحي خالة ( أعطاها كرسي لتجلس عليه ) ، هاتي لشوف شو صار معك ...
أم راتب : قبل ما يموت أبو راتب تعب كتير و صحته صارت على قدها ، قام قلتلو يكتب وكالة عامة لابننا الوحيد راتب مشان هوه يمشي لو معاملات أجارات البيوت اللي منملكها و يمشي أوراق المكتب و الشغل ...
الصيدلي : إي رز الله.....راتب اللي من زمااااااان كان بيبي و لهلا بتذكر كيف كنتي تيجي لعندي مروقة و طاير عقلك فيه و تقلي لي عطيني بامبرز لأنه راتب عملها عليي هالضرسان و تكون الدنيي مو واسعتك بابنك الله يسلمه ...
أم راتب : إي والله يا ابني ... كنت كتير فرحانه فيه و خصوصي انو وحيد و اجاني على كبر بعد زواجي بسنين ...
الصيدلي : و كيفو السيد راتب هلا أكيد تزوج و صار عندو ولاد ...
أم راتب : إي تزوج و صار عنده بنت ، وهوه ماسك كل أملاك أبوه ...
الصيدلي : إي خاله ما كملتي لي القصة تبعك ...
أم راتب : بعد ما مات أبو راتب ...آه شو بدي قول لقول....استغل راتب الوكالة العامة اللي معو و كان ناقل كل شي لأسمو و أخد كل شي و راح و ما عدت شفتو إلا بالمناسبات و ضليت لحالي عايشة ببيت العيلة ...
الصيدلي : إي!!؟؟
أم راتب : و من شهر ضاقت معو الأحوال شوي ...قام باع بيت العيلة و استأجر لي غرفة و منتفعاتها بهالحارة و قال لي انو أنتي متعودة على هالحارة و راح ...
الصيدلي : له له يا راتب ...كل هاد يطلع منوه المغضوب...إي الله لا ....
قاطعته الام و قالت : لا لا لا تحكي هيك اذا بتريد ..الله يصلحه و يهديه ...
الصيدلي : ولا يهمك يا خاله..اعتبريني ابنك و أنا جاهز لأي شي تحتاجيه و بأي وقت...قولي لي ..بدك شي أدوية هلا؟ ...
أم راتب : لا ، بدي بامبرز قياس كبير كتير .من قياس ابني راتب ...
الصيدلي : ليه بقى !؟ ...
الأم : لأنو لما كان صغير و يعملها عليي و حفضو يفرح و يركض و يحضنني و شم ريحتوا....بركي هلا بعد ما كبر و عملها عليي إذا بحفضو بيرجع لحضني و بضمو و بشمشمو .......
