الرئيسية
يللي عم تاكل عم تشرب
وبايَّ مطعم كنْت
مندقلك منغنيلك ومنسهر نحن وانتْ
هنّي الاكلات ذاتن والغنيّات ذاتن
حتى السمّيعة ذاتن
لشو التغيير؟!
يللي عم تكدح يوميّة وبأيّ شغلة كنتْ
كنّو فكرك انو بكرا بيحمينا نحن وانتْ
هنّي الاوادم ذاتن
ما بيحميهن غير ذاتن
بيضلّن هني ذاتن
لشو التغيير؟!
يللي عم تطمح عل فاضي
ومن اي ديانة كنتْ
المستقبل متل الماضي
والحاضر هو انت
ما هنّي الطوايف ذاتن
وبيجتمعوا مع ذاتن
حتى يختاروا ذاتن
لشو التغيير؟!
يللي عم تنطر بالفييّ
وتحت العريشة كنت
شي علاقة رومنسية مع احلى واجمل بنت
هنّي البدايات ذاتن والنهايات ذاتن
حتى لو منن ذاتن
لشو التغيير؟!
يللي عم تحلم ليليّ
وبأية فرشة كنت
ب شي صبية هيفاويّة
تتنسى وينك انتً
هني الصبايا ذاتن
حتى البوسات ذاتن
وبما انو هنّي ذاتن
لشو التغيير؟!
يللي عم تحصر افكارك
على اي محطة كنت
مهما تحصر مهما تحلل
رح تبقى حيث انتْ
هنّي اللي بيحكوا ذاتن
وما بيسمعوا غير ذاتن
خدهن على علاّتن
لشو التغيير؟!
يللي عم تسعى للهجرة
وعلى اية دولة كنت
مهما تسعى انا بالعشرة
ببصملك وين ما نزلت
هني البلدان ذاتن
شمالاً وجنوباً ذاتن
شرقاً وغرباً ذاتن
لشو التغيير؟!
يللي عم تسمع للوقتي
ومفكر في شي جديد
طمّن بالك هيّ هيّ
ولا نوطة فيك تزيد
هني الافكار والالحان ذاتن
حتى الموسيقية ذاتن
لشو التغيير؟!
...آخر فكرة لولادي
وأيضاً لولاد الناس
يللي حلمن عم بزهّر
حلمن عالعين والراس
بركي التغيير...جايي
على حظّن هنّي...جايي
رغماً عن حزني جايي
انشالله التغيير
على ايدن هنّي جايي
كرمال عيونن جايي
انشالله التغيير
على وجّن هنّي جايي
ولو مهما طال جايي
انشالله التغيير..
