الغاية تبرر الوسيلة هل نتبع هذا المبدأ في حياتنا

ناقش بصراحة ووضوح رأيك الشخصي بمقولة الكاتب السياسي الإيطالي نيكولا ميكافيللي : الهدف النبيل السامي يضفي صفة المشروعية لجميع السبل والوسائل التي تؤهل الوصول لهذا الهدف فالغاية تبرر الوسيلة



على فكرة صاحب هذا القول هو نيكولا ميكافيللي كاتب سياسي إيطالي مشهور مات سنة 1532 م صاحب مذهب الميكافيللية فيقال أنت إنسان ميكافيللي أو صاحب قرارات ميكافيللية .. يطلق هذا اللقب على كل من اتبع مبدأ ميكافيللي الأول ” الغاية تبرر الوسيلة ” ، وهو أشهر مبدأ عُرف به ميكافيللي ، فـهو يرى بأن الهدف النبيل السامي يضفي صفة المشروعية لجميع السبل والوسائل التي تؤهل الوصول لهذا الهدف مهما كانت قاسية أو ظالمة ، فهو لا ينظر لمدى أخلاقية الوسيلة المتبعة لتحقيق الهدف ، وإنما إلى مدى ملائمة هذه الوسيلة لتحقيق هذا الهدف .. فـ الغاية … تبرر الوسيلة .. وكان هذا المبدأ هو ما استند عليه في أغلب نصائحه في كتاب الأمير ..

بانتظار ردودكم هل نتبع هذا المبدأ في حياتنا؟

الغاية تبرر الوسيلة صح مية بالمية

وكل ما كبرت الغاية كل ما صارت قادرة تعفس اكبر مبدأ وتتجاوز اهم القيم

واللي عندو غير هيدا الرأي وكتير انسان خلوق ومسالم دلوني عليه لانو بدي ادين منو شي 100 الف

نصبه : بس لا حدا يقلو

مشكورين عالمرور ويمكن عم نطبق هالمبدأ بحياتنا بدون ما نحكي صراحة انو عم نستخدمه نورتو الموضوع

بعتقد انو صار الأخ ميكافيللي اشهر من الآلهة عشتار

والمذهب الميكافييلي موجود كالوباء في الوسط السياسي بشكل عام والعربي اكتر (بيعتبروه مثل يحتذى )

ولميكافيللي قول مأثور :

(اكذب اكذب ، حتى تصدق نفسك ، فيصدقك الآخرون )

انا ضد هالمبدأ ، واصلاً عيب تسميتو مبدأ

ومو صعب الانسان يعيش بالأخلاق ، هي مو شاعرية مستهلكة ، هي قرار وارادة

ولو يا مستشار إبليس ولك تكرم .....من المية قرش ...للمية ليرة .....

اول شي شهرة ميكافيللي دليل على انو شريحة كبيرة من المجتمع عم تطبق مبدأه بالحياة لان هي شريعة الغاب والدليل الاكبر هوي كلامك عن تواجده بنسبة كبيرة بالحياة السياسية لان السياسة اللي بيتبعها اي مجتمع بدل على ماهية هالمجتمع وتوجهاته اما بالنسبة لموضوع الكذب فكلنا منكذب كل انسان وانا اول وحدة في مطارح الكذب فيها محلل فيك تشوف هالشي بكتاب تحف العقول عن الرسول مشكور اخ صالح

اكيد لاء ..
او يمكن تكون الشغلة نسبية ..
يمكن الشب يخاطر كتير منشان حدا بيحبو ويتبع طرق مخاطرة بس حقو ..
وايا شي تاني ممكن متل اللي بيفجر حالو منشان يحرر ارضو ..
بس انو شخص يقتل شخص تاني منشان سرقة او شي هيك بيختلف الامر مشكورة حمصية ..

يعني انا بفهم من الرد انك عم تبرري لاصحاب هالمبدأ شو عما عملو

انا ما بعرف هالكتاب ، بس ما بعرف اذا الرسول رح يقول شي ويعمل عكسو ، والا ما كان بيفرق عن البشر العاديين

قال الرسول في احدى خطبه :

انما بعثت لأتمم مكارم الأخلاق

والأكيد الكذب مانو من مكارم الأخلاق


مشكورة

الغاية اكيد لا تبرر الوسيلة مهما كانت نبيلة
مستحيل نقدر نوصل لغاية وهدف نبيل بطريقة كلها اذى و شر
مستحيل تكون ظابطة هيك
مستحيل تبقى الغاية نبيلة بوسيلة غير شرعية
يعني واذا هيك كانو الدكاترة والعلماء يلي بيعملو لقاح لمرض خطير طبقوه على الانسان مباشرة ويمكن بدون ما يعرف واذا مات عاااادي لانو الغاية نبيلة وهي معالجة المرض و هني بدون نتائج صحيحة مية بالمية ما بتعطيها الفيران
وكمان اذا كانت غاية النبي ينشر دين الله وهي اكيد غاية نبيلة بيقوم بيعمل مجازر و بيقتل الناس
عاااادي لانو غايته نبيلة اكيد مو ظابطة
يعني هدول من الامثلة يلي خطرو عبالي واكيد في غيرون
ويلي بيقرر هالموضوع بحياتنا هي اخلاقنا ومبادؤنا

مشكورة كتير الحمصية ع موضوعك المميز

اول شي مشكورة كتير على هالموضوع الحلو
انا وحدة من الناس ممكن اني اعمل كل شي بقدر عليه لاوصل لغاية
بس مو على حساب حدا يعني ما بأذي حدا لاستفاد
و ما بعمل شي مو مقتنعة في او ضد مبادئي
انا ضد هيدا المبدأكمبرر لكل الاعمال اذا بتوصل للهدف
لانو بالنهاية مو مهم لوين رح توصلي المهم كيف وصلتي
و صدقيني لما رح توصلي بطريقة خط
ا او بأساليب مو اخلاقية او نبيلة مرح تستمتعي بوصولك
انا كتير عندي حساسية من هالمبدأ

انا احد انصار هذا المبدا و غيره الكثير من المبادئ او الشعارات ولا اخجل
يعني ليش الخجل اساسا
لا يوجد احد في الحياة باكملها الا واعتمد هذا المبدا
لغاية تبرر الوسيلة
اذا الرسول الاكرم محمد عليه السلام عمل عل نشر الاسلام اولا بالرفق و اللين فلم يستجب له احد فاضطر الى الشدة
اذا اعتمد ان الغاية تبرر الوسيلة طبعا الغاية شريفة و لكن الوسيلة شديدة

ايضا المسيح عليه السلام
اعتمد هذا المبدا ولكن بشكل معاكس
عندما بدا يؤمن به الناس كانت طريقته جعل من معه يتحملون الالام وهذا فيه شدة جسدية ايضا
ايضا هنا الغاية بررت الوسيلة لان الغاية شريفة

قصة سيدنا يوسف عليه السلام معترف عليها وعلى غاياتها ووسائلها
ولكن ايضا كانت الغاية شريفة
وصاحب هذا المبدا كان بداية نص مبداه الغاية الشريفة لا الغايات القذرة
اذا هو لم يجلب شيئا جديدا وانما كان موجودا ولكن ضعاف النفوس لم يروه ولم يعتمدوه
والابشع انه هذه الايام تسمع قول الغاية تبرر الوسيلة دون ذكر الجملة كاملة
اي كانكم قلتم
لا تقربوا الصلاة
وتناسيتم تكملة الاية
لا تقربوا الصلاة وانتم سكارى

وهيك معظم الناس ماشيين

انا حابة قول لصالح وسويت هارت انو الرسول اكيد بعث ليتمم مكارم الاخلاق بس في لكل قاعدة استثناء طبعا هالكلام ما جايبتو من عندي ورد في كتاب تحف العقول عن الرسول عندما كان يخاطب الامام علي كرم الله وجهه .......... يا علي:ثلاث يحسن فيهن الكذب:المكيدة في الحرب.وعدتك زوجتك. والاصلاح بين الناس وبالنسبة لكلام نسيت انساك انو ما في غاية نبيلة بتتحقق بطريقة مانها مشروعة بظن انو ما في انبل من الاصلاح بين الناس والكذب مباح لتتحقق عالغاية وبعدين عيوني مين قلك انو الدكاترة ما عم يطبقو على الانسان وياريت انسان واحد الشرق الاوسط والقارة الافريقية هني عبارة عن مخابر معملقة للدكاترة وتجاربهم الدوائية اذا ما انقال هالشي بصراحة ما بيعني انو ما عم يصير مشكورين

اليشو بشكرك عالمرور وكلامك مزبوط العالم بتمشي ب هالمبدأ بدون ما تحس يعني انا مثلا وكتار متلي ما بمانعو انو ينقلو شي سؤال بالامتحان مشان النجاح بمادة معينة والغاية النجاح ومافي احلى من النجاح والغش كمان حرام ومنرجع نضحك على حالنا ونكذب ونقول نحني ضدهالمبد وحابة قلو لمستر هاكر انو كلامك عجبني مافي احلى من الصراحة وكلام الواقع مشكورين شباب عالمرور

وبعدين عيوني مين قلك انو الدكاترة ما عم يطبقو على الانسان وياريت انسان واحد الشرق الاوسط والقارة الافريقية هني عبارة عن مخابر معملقة للدكاترة وتجاربهم الدوائية اذا ما انقال هالشي بصراحة ما بيعني انو ما عم يصير مشكورين

كانك معلقة على انو عم تصير ولا لاء مو معلقة على المبدأ
يعني حسب رايك انتي هالشي مشروع؟
وبتمنى شوف رايك على غاية نشر الدين بطريقة ظالمة واجبار
وبعدين انا شو بيهمني اذا عم يصير ولا لاء ومنشان هيك انا ختمت رايي بانو مبادىء الشخص و اخلاقه هي
يلي بتخلي هالشي مبرر عنده او لاء

انا عم رد عليك نسيت انساك وبعدين وقت الانسان بيبدي رأييو باي موضوع المفروض يدافع عن رأييو بعدين ملاحظة انو في تناقض بحكييك يعني علقتي عليي وقلتي اني مهتمة بموضوع بصير او لاء ورديتي سألتيني بصير او ما بصير بتمنى الوضوح بردودك وبظن انو لازم يهمك بصير او ما بصير دام انك عم تعلقي عالموضوع من اساسو مشكورة

انا ضد هل الفكرة والغاية لا تبرر الوسيلة مهما كانت هذه الغاية نبيلة

بس بحب قول شغلة للزميل MR HACKER

ايضا المسيح عليه السلام
اعتمد هذا المبدا ولكن بشكل معاكس
عندما بدا يؤمن به الناس كانت طريقته جعل من معه يتحملون الالام وهذا فيه شدة جسدية ايضا
ايضا هنا الغاية بررت الوسيلة لان الغاية شريفة

هههههههه لم تكن وسيلة السيد المسيح يوما هي تعذيب من معه ؟؟ ولم يعتمد مبدا الغاية تبرر الوسيلة ... لأن الغابة لا تبرر الوسيلة في الحياة المسيحية وبتمنى مرة تانية ما تاخد السيد المسيح مثال على ردودك وخاصة إذا مانك متاكد من الشي يلي عم تحكيه .

شكرا