انت مدعو لاستجواب احد الاعضاء ....!!

allii كتب:ليدي 7 ايام معك للنضال من اجل البراءة ..
الله يستر ..

1- هل انت قوية ..وبماذا تبررين ذلك ؟
وبكـــــل فخـــــر .. أجـــــــــل أنا قويــــــة ..
أبرر ذلك : حسن التصرف في مواقف الحياة ..
الحياة مدرسة بتعلم بقسوة أكيد .. بس .. المهم انها بتعلم .. وأنا تلميذة نجيبة ..


2- ماذا يعني لك الحب ..هل هو موجود في حياتك
الحب أجمل وأرق شي بالحياة ..
وبدونو بيكون الإنسان متل الدمية ..
الحب أكيد موجود بحياتي وبحياة كتار ..
حب وطني .. حب عائلتي ..
حب النفس .. الحب الرومنسي في طريقي لاختباره ..


3-من اعز الناس على قلبك
حبيبة قلبي ماما ..

4-هل تتنازلي من اجل رجل عن شيء يخصك
السؤال مابيقبل جواب نعم أو لا ..
مبادئي في الحياة ثابتة ومعروفة .. ومتغلغلة في نفسي ..
والنقاش دائماً مفتوح يا بقنعو يا بيقنعني .. ( بس أكيد رح اقنعو !.. ) ..

الكميت كتب:

صار دور ليدي
يا سلاااااااااام
مين مين ليدي مين ..

يلا يا كميت رشا ودراكا على ليدي

صامدووون ..

أول شي يا ليدي
على اي اساس بتختاري اصدقائك
على اساس المستقبل أم ؟؟؟؟

أم شو !..

بختار الصديق\ة بالاعتماد على عدة أسس ..
وفي مراحل كتيير بيمر فيها الشخص قبل مايصير صديق ..
واختباراااات .. و و و ..
أول شي بختار الأصدقاء على أساس الصدق والوفاء وانعدام أي نسبة أو احتمال للغيرة أو الحسد ..
توافق الاهتمامات .. الأفكار المتشابهة ..
يلي بضمن امتلاكه لتفكير سليم مشان بعض النصائح يلي ممكن احتاج آخدها ..



تاني شي
كم صديق حسب اعتقادك يمكن تخرجي من الجامعة ويكونوا من أصدقائك الدائمين


في أشخاص مقربين لليدي موون بالواقع .. وبحترمهم جداً ..
ومعرفتنا كمان رح تكمل بعد الجامعة ..

مارح اذكر أسماء ..
لأنو هاد السؤال ورطة حقيقية ..




تالت شي

شو الفرق حسب اعتقادك بين ليدي مون وبين شخصيتك الحقيقة
حسب ما بتشوفيا انت وحسب ما بيشوفوها رفقاتك يلي بيعرفوكي
ايواااااا ..
كنت حاسة من الأول انك رح تسألني هالسؤال ..
يلي بيجمعني مع ليدي مون هوي " الموون "
وبصراحة ماحدا بيعرفني حقيقة وبيقول أنو في أي اختلاف بين ...... بيني أنا وبين ليدي موون ..
عموماً التعامل بشفافية هون ع المنتدى هوي يلي عم يقلص الفرق بيني وبين ليدي ..
لهيك من وجهة نظري انا وحسب ماني شايفة حالي .. لايوجد اختلاف ..
اما بالنسبة لرفقاتي .. اذا حدا عندو وجهة نظر ياجماعة قولوا .. مين لاحظ اختلاف ؟؟!!..


طبعا هدول أسئلة اقتتاحية وعاديين ومهمين وما تقلنا العيار
بس الله يسترك بعدين

بانتظار الاتهامات .. قصدي الأسئلة ..
الله يستر ..

broken heart كتب:ليــــــــــــــــــــــــــدي كم سؤال خفاف نضاف ماشي؟؟؟؟؟اي ماشي

موضـــــــــــوع بالمنتدى انتي نزلتيــــه مميز عندك..........
موهبة الهرولة نحو الضوء ..

موضوع بالمنتدى انتي نزلتيـه كنتي متوقعة ينقرا أكتـــر نظراً لاهميتو طبعاً......
ايييي .. بتذكر ببدايات تسجيلي بالمنتدى طرحت موضوع : الزواج أو الدراسة ؟ ..
كان في مشاهدات بس مافي ردود ..
طبعاً كان جهد شخصي مني انا ..
بس يلي لفتني انو بعد فترة حدا من الأعضاء نزل نفس الموضوع بس الدراسة او الزواج ..
ولاقى صدى وردود ..
مابعرف ليش ؟؟


موضوع بالمنتدى "هالمرة مو انتي اللي منزلتيه"...بتعتبريه من اهم المواضيع على الاطلاق..
في عدة مواضيع .. على درجة عالية من الأهمية ..
بس مهمة على الاطلاق .. مابظن في هيك موضوع ! ..
في طرطوس نحو مجتمع أرقى .. الخيانة ليست رجل ..
أريدك أنثى من المواضيع الجميلة ..
خواطر بروكن هارت " ما انتي ها عم احكي عن بروكن " كل خواطرها رائعين ..
حالياً هدول يلي خطروا ببالي ..


شو قصة المواضيع معك !.. تعبت وانا اتذكر ..

يتبـــــــــــــــــــــــع....
برضو الله يستر ..

broken heart كتب:ليـــــــــــــــــدي سؤال عالماشي...
كيف تزعج ليدي...اللي زاعجها؟؟؟؟؟؟؟؟؟؟؟؟؟؟؟

هاد سؤال ع الماشي !!.. لكن الأسئلة يلي ع الواقف كيف !! ..
ايــــــه يا بروكن .. شوفي بقا حسب درجة انزعاجي من هالشخص بزعجو ..
واذا كنت فاضية وما عندي شغل بتفنن بطريقة الإزعاج ..
بس بيجوز أحياناً انزعج يكون الشخص مامهم كل هالقد لهيك لا بعذب حالي ولا بتكلف إني ازعجو ..
بدير ضهري ومشي ..
ولشو هالتعبة القلب !..
خليه يحكي ويزعج الهوا يلي حواليه ..
ناقصني وجع راس أنا !..
بس بشكل عام .. بدور على شي .. بحركش بأفكارو وبشوف شو بيكره وبساويه وبحطو بموقف مزعج مشابه لدرجة الازعاج يلي سببلي اياها ..

kareem el-cheikh كتب:ليييدي و قعتي و ما حدا سمى عليكي ههعهعهعهع
لااااااااا .. كريم هنا ! ..
أهليــــن كريم .. والله يستر ..

يلا لنبلش الأسئلة دون لف و دوران


1 - أي ساعة من اليوم بتحسي حالك بقمة النشاط ... و بيوم بعني ال24 ساعة
بين 10 الصبح و 1 الضهر .. بكون في قمة نشاطي ..

2 - هل حسدتي يوما ما حدا على شي بيملكو ... شي مادي أو معنوي....مارح اسأل مين بس رح اسأل شو هالشي؟؟
حسد !!..
لا لا ما حسد ..
ولكن بيجوز شي " مادي أو معنوي " اتمناه يكون معي أنا كمان ..
رح اكتفي بالشيء المادي وقلك اياه ..
يكون عندي ولو غرفة صغيرة بضيعتنا ..
الي انا وبس ..
وقدامها جنينة ازرع فيها يلي بدي اياه ..
واسقيها كل يوم الصبح ..
واشرب قهوة وفوقي شمس ضيعتنا .. وحواليي عطرها ونسماتها ..
وقدامي العشب والشجر الأخضـــــــــــر ..
ايـــــــــــــــــــــــه .. يااارب ..


3 - هل برأيك لازم نحمل معنا شي من الطفولة ... إذا نعم...شو حملتي معك من طفولتك؟؟
اي أكيد .. ماقصة لازم تحمل معك ..
القصة أنو الطفولة شئنا أم أبينا رح تترك آثارها وعلاماتها فينا ..
لأنها الخميرة والعجينة الأولى يلي تكونا منها وصرنا هيك هلق ..
حملت معي من طفولتي :
الإحساس .............


4 - الصديق الحقيقي بالنسبة إلك...لازم يحاول يظهر الجانب الايجابي فيكي أو لازم يحكي دائما إلي بقلبو حتى لو كان بحكيو سلبيات؟
ايواااا .. هيدا سؤال بدو شرح :
كريم ..
صديقي أكيد ماهوي يلي بيقعد يمدح فيني ع الطالعة والنازلة ..
لالالا ..
ولكن الصديق هوي يلي بيبقى معي .. بيظهر إيجابياتي قدام حالي لحتى يقويني ..
وبيصارحني بأخطائي ولكن على هيئة النصيحة الفردية والمغلقة .. يعني بيني وبينو ..
ما أمام الجماهير الغفيرة ..
ينقدني معلش ..
بس وراء الستارة ..
ويكون النقد بأسلوب ما انجرح فيه ..
ويفضل يكون هالنقد على هيئة نصيحة ..


5 - هل خانتك فراستك "الحاسة السادسة" بيوم من الأيام؟؟؟ .... إذا نعم ... حكيلنا شي موقف
أما إذا لا....فهل بتعتمدي عليها دائما؟؟
أكيد حاستي مامنزهة عن الخطأ ..
خانتني نعم ..
لأني سمحت لعواطفي تأثر عليها ..
فاختلط الإحساس بالعاطفة وضاعت الأفكار ..
وصار زلزال خفيف ..
بس الحمدلله الأضرار كانت مادية بحتة ..
وكنت محمية من الأخطار ..
بس مع هيك بعتمد عليها بنسبة 86% بقراراتي ..
وخاصة أنو في كتير قرارات بتخلني اوقع بشباك الحيرة العقلية ..
لهيك بلجأ لحاستي بتنقذني غالباً ..
بس هموماً .. حاستي صادقة جداً بالأشخاص ..
وأحدث قصة صارت معانا أنا والصبايا من فترة .. زهر وبروكن ..
قلتلهم شغلة ماصدقوها بالبداية ..
وهلق عم تنثبت شوي شوي ..
وعم يبين انو كان إحساسي صحيح مية بالمية ..
كريم أنا نظرتي بالأشخاص مابتخيب ..


أخيرا و ليس آخرا 6 - وين ليدي بعد 9 سنوات؟؟
اوووووووووه 9 !!!!.. يعني بالـ 2019!! ..

عميدة شي كلية هعهعهعهع ..
بعد 9 سنين بتمناكي يا ليدي تكوني صاحبة الكلمة الأولى والأخيرة مهنياً ..
نجمة لامعة أسرياً ..
أنثى ناجحة وقوية .. أكثر نجاحاً وأكثر قوةً ..


يلا إذا اقتنعت من الاجابات رح اسألك لسة لأنو بتكون عجبتني الشغلة هيهيهيهيهيه
يلا سلام
بالله العظيم !.. لا بدك ماتواخذنا !..
انشالله كانت الإجابات مقنعة مسيو كريم ؟!..
قديش علامتي ؟ !..

broken heart كتب:ليـــــــــــدي فكرتيني خلصت مو اي لا ماحزرتي......
سؤال اللحظة...
لو خُيّـــــــــرتي انك تطلعي معيدة عنــــا بالكلية
شو هيي المادة اللي بتحبي تدرّسيها وليش؟؟؟؟؟؟؟؟؟

الكميت كتب:عدنا والعود أحمد
والله يعينك



أول شي
أنا بعرفك ياليدي انك مابتعملي أو مابتحكي الشي إلا يلي مقتنعة منو حتى لو حدا زعل من هالشي
وسؤالي اينو أخر مرة عملتي أو تصرفتي أو كتبتي شي وبعدين لغيتيه لأنك ممكن فكرتي انو حدا رح ينزعج من هالشي وشو هوي هاد التصرف وشو مبررك

إحساسي بيقلي انك كنت حاضر وقت صار هالموقف ..
الموقف صار هون بالمنتدى من كم يوم ..
كان في سؤال معين .. أنا أجبت عليه بوضع أربعة أسماء لأربعة أشخاص ..
بس بصراحة رجعت غيرتو وشلت الأسماء .. مالأنهم ماصحيحين بالعكس .. يمكن لأنو صحيحين كتير .. ويمكن لأنو اكتشف انو في ناس تانيين هنن من ضمن الجواب .. بس بشكل جزئي .. وخفت انفهم غلط ..
لهيك تم حذف الأسماء واكتفيت بالتلميح ..
ع الذمة ماشفت الجواب يا كميت قبل ماعدلو؟؟!!..


تاني شي نأتي للناحية العاطفية
شو أحلى لحظة حب عشتيها وشو اسوأ لحظة
حتى لو مجرد تفكير
كميت يا صديقي .. حب بمعنى الحب لسا ما خضت هالتجربة .. مريت بحالة تعلق بسيطة وهالتعلق كان ناتج عن ظروف انحطيت فيها .. بس المؤكد انو بعيد كل البعد عن الحب ..
لهيك أحلى وأسوأ لحظة حب غير موجودين حالياً الرجاء ترك رسالة أو الاتصال لاحقاً هههههههه ..


وكمان كيف ممكن تلفتي نظر شخص عجبك وقلبك صار يدق لما يشوفو ومن هالحركات يعني
شو ممكن تتصرفي
كميت !!!!.. هيدي أسرار المهنة بدك اياني افضح حالي ؟!!..

هل ممكن تبادري لحالك بأي تصرف
لا لا مافي مبادرة بمعنى المبادرة بس في محاولة للتمهيد اذا كان الشب خجول مثلاً ..
بمهد مرة واتنين مشي الحال مشي .. مامشي .. بدير ضهري وبمشي ..

وشو هوي هالتصرف أو ممكن تدخلي أصدقائك
أصدقائي المقربين جداً جداً جداً ممكن ببعض الحالات استعين فيهم لمساعدتي في الحرب ع الجبهة الساكتة ..
حسب بقا ..
الشخص .. الموقف .. اذا بيعرفوه أصدقائي او لا ..

أو جعل عمرو اذا هوي مابادر لحالو
ههههههه .. حلوة حلوة هيدي ..
اي بتصير جعل العمرو اذا مابادر بعد التمهيد البسيط يلي انا بعملو .. بس المؤكد انه من سابع المستحيلات اني بادر ..


وكمان اذا انت وشخص حبيتو بعض ومافيكن تستغنو عن بعض يعني كل شخص شايف بالشخص التاني حياتو
وأجوا أهلك وقالولك هالشب مابدنا ياه ومابيناسبنا ومستحيل نوافق عليه شو رح تكون ردة فعلك وشو ممكن تتصرفي بهالموقف
كميت مافينا نفترض هيك ونسكت ..
أول شي بتحاور مع أهلي .. بقعد انا وماما جلسة صراحة بقلها وجهة نظري وبتقلي وجهة نظرها ..
بجوز يكون الحق معاهم واقتنع انا وادرك حجم الخطأ يلي كان ممكن ارتكبو ..
وبجوز يكون الحق معي واقنعهم ويدركو انو سعادتي تكمن هنا ..
انا وماما مستحيل نختلف على هالقصة .. كتير كتير في تقارب فكري بيناتنا ..
لهيك ماني شايلة هم .. هههههه ..


ثالثا
بكل صراحة
انت شو بتفضلي تكوني ليدي مون أم شخصيتك الطبيعية
وبتحبي الناس ينادولك بإسم ليدي أم بإسمك الحقيقي
انا بعشق اسمي الحقيقي .. وين ماكان بتلاقيني كتبتو .. بس ليدي مون بحبو حب كبير جداً ..
يعني اذا بحب اسمي الحقيقي بنسبة 100% بحب اسم ليدي مون باسم 99% ..
وخاصة لما زهر بتقلي ليدو ..
اكيد بفضل اسمي .. بس لامانع من التجديد بين فترات متباعدة وتندهولي ليدو مابزعل انا ..


وكمان شو سبب اختيارك لاسم ليدي مون بالتحديد وشو بيعنيلك هالاسم بالتحديد
بصراحة هون بدكم تسألو أختي ..
انا مولعة بمنظر القمر .. وخاصة لما بتكون حدو نجمة القمر المضواية رفيقتو الدائمة ..
لما منطلع ع الضيعة وبتكون السما صافية بالليل والقمر مضوي هالدني كلها بكون أنا في قمة الفرح والسلام والنقاء ..
وبكون خارج هالدني .. بدنيا خاصة فيني انا ..
وأختي لاحظت هالشي من ايام الثانوي .. وسمتني حسناء القمر ..
وصار ليدي مون اسمي الروحي ..

بعرف اني ماتقلت كتير وماقويت العيار واسئلتي كانت خفيفة نضيفة ومافيا أي احراج مو هيك ليدي
لا .. من ناحية أسئلة خفيفة يخزي العين شو خفيفة ..
بس بحب أسئلة كميت .. بتعمل حالة من استنهاض الروح داخلي ..

شو اسا بدك اسئلة أم حاجتك
انت قرري
ولو يا كميت .. هل عهدت مني يوماً ما الخوف أو الانسحاب !..
اسأل وانا لها ..
هات ماعندك ..

‏

الكميت كتب:شو هاد ياليدي أنا بعرفك دبلوماسية بس مو لهدرجة
شو هاد مدح ولا ذم ؟؟!!..

بس عندي كم شغلة
بالنسبة لسؤالي الأول
إحساسك بمحلو وهاد دليل جديد عيلي بيشكك بإحساسك
ولو يا كميت .. خبرة خبرة
وإنت فاجأتيني مرتين مرة بجوابك والمرة التانية وقت عدلتي الرد لأني شفت الردين
يا كميت الجوابين صادقين وطالعين من القلب بس ليش تفاجأت انت ؟؟!!.. ماكنت متوقع هيك أسماء بالجواب ؟؟!!..
عموماً تم التغيير لأسباب فنية .. وتم التوضيح سابقاً ..

وبالنسبة لسؤالي اذا انت وشخص حبيتو بعض
لنفرض مثلا انو أهلك عاجبن شخص وشايفينو انسبلك من حبيبك من كل النواحي
وحتى لو تناقشتي مع أهلك بس أهلك عندن فكرة انو هالشخص يلي اختارولك ياه انسبلك شو رح يكون اختيارك
في شغلة .. ماما مستحيل تجبرني بخيار أنا مابدي اياه ..
يعني مثلاً اذا هنن شايفين انو الشخص التاني أنسبلي بيضل رأيهم وهنن بيعرفوا أنو الكلمة الأولى والأخيرة الي وعاطيني الحق الكامل باتخاذ الكلمة الفاصلة ..
لهيك أنا عندي قناعة أنو ماممكن انجبر على شخص ..
وبالنسبة ليلي بحبو .. بما اني مقتنعة فيه كل هلقد ومقتنعة بحبنا فأكيد رح يكون عندي القدرة ع الدفاع عن هالعلاقة ..
بس بالنهاية أنا مابرضى أنو علاقة هالحب تنبنى من الأول عل زعل أهلي وعدم رضاهم عليي لهيك رح استنفذ كل فرص الترغيب ..
وبعدين هوي شو قاعد عم يشتغل مثلاً ..؟؟!! لازم يساعدني ويبرهن انو هوي منيح وقدها وقدود انو يكون مع بنتهم " يعني معي " ..
وبالنهاية انشالله ماانحط بهالظرف لأنو بيبقى الموقف عملياً أصعب منو نظرياً ..

وكم سؤال عالماشي
شو سبب تعلقك بالسياسة وخاصة انو نسبة البنات قليلي الميول تجاه هالشي
أنا السياسة بتاخد جزء كبير من وقتي ..
ويمكن حبي للتحليل ومعرفة كل شي عم يدور حواليي هوي السبب ..
بحب دائماً كون على اطلاع على كل الأخبار الجديدة ومايفوتني شي ..
أما بالنسبة لشغلة انو البنات قليل اهتمامهن بالسياسة : اي لاحظت هالشي .. بس مابعرف ليش .. يمكن لأنو بالنسبة لبعضهن السياسة مواضيعها ناشفة وتحليلية بحتة ..
وغالباً هالمواضيع بتكون نسبة الاهتمام فيها مرتفعة عند الشباب اكتر ..
بس هاد مابيعني انو السياسة شبه معدومة عنا نحنا الصبايا ..

وكمان شو سبب تعلق ليدي مون بزهر الجلنار وبروكن هارت مع انكن مابتعرفو بعض من قبل
في شي اسمو تقارب أرواح يا كميت .. ماالو تفسير .. يعني انت بس تشوف شخص وتحس انك انت واياه صحبة من عشر سنين هاد تآلف أرواح لا يخضع للقوانين ولا للتفسيرات .. وهكذا كانت بداية هالصداقة الرائعة ..

ومين أغلى منن اذا في ومين بتحسي انو أقرب عقلبك من بيناتن
انت بهالشي كأنك عم تقلي اختاري بين اخواتك التنين .. وهون صعب جداً الاختيار بل انه مستحيل ..
كل وحدة منهم آخدة جزء من قلبي ..
جزء مخصص للوفاء والمحبة الدائمة ..
بإذن الله عندي قناعة انو مارح نفترق مع الزمن ..

جاوبي بدون احراج
مع العلم انا كتير بنبسط وقت بشوف هيك صداقة عميقة وصادقة وكلها مرح
سؤالي بهدف معرفة سر العلاقة وليس بأي هدف تاني منشان ما انفهم غلط
ولا يهمك يا صديقي ..
وكمان

بيقولو الحب نعمة النسيان شو رأيك بهالقول وشو تأثير هالقول بحياتك
‏مافي شي اسمو نسيان الحدث ..
ولكن في شي اسمو نسيان تأثير هالحدث ..
يعني انت مابتقدر تنسى شي صار معك .. ولكن مع الوقت بتنسى تأثيرو عليك يعني ماعد تحس بتأثيرو السلبي بالعكس يمكن يصير مكانو تأثير ايجابي ..
أصلاً مالازم ننسى لأنو هالأحداث يلي عم تصير هيي دروس النا .. لازم نتذكرها لحتى نتعلم منها مستقبلاً ..
لهيك نسيان الحدث مانو نعمة .. ولكن خطأ ..
انا خلصت اسئلتي لأني عرفت يلي بدي أعرفو
ومن ناحيتي أيتها المتهمة انت بريئة بريئة بريئة
الحمدلله .. هاد أول شخص بيقر ببراءتي ..
مشكووووور محقق .. قصدي مشكوووور الكميت ..
تحياتي الك يا صديق ..